Bangladesh-ah President Kovind a zin

President Ram Nath Kovind chu ni thum cham turin nimin khan Bangladesh-ah a zin a, vawiina Bangladesh Victory Day vawi 50-na lawmnaah khuallian a ni ang.

Covid-19 hripui a len hnuah President Kovind hi ram pawn lama a zinchhuahna hmasa ber a ni a, March thla khan prime minister Narendra Modi pawhin hripui len hnuah ram dang a tlawhna hmasa ber turin Bangladesh ramah hian a lo zin tawh bawk.

President Kovind hi December 17 thleng chamin a cham chhung hian Bangladesh president M Abdul Hamid nen meeting an nei dawn a ni. Dhaka-a Ramna Kali temple pawh a tlawh dawn a, he temple hi Mughal hun laia sak niin, kum 1971 March thla khan Pakistan sipaiten an tihchhiatsak a ni. Kum 2017-a khatih laia India external affairs minister Sushma Swaraj-i'n Bangladesh a tlawh ṭum khan, he temple din thar lehna turah India-in a puih tur thu a lo puang tawh a ni.

Vawiina Bangladesh Victory Day lawmnaah hian parade-ah Indian armed force aṭangin member 122 awmna tri-service contingent pawh an tel dawn a ni.