Bawng talh loh chauhin dan loa intihhlumna thleng a reh ang : RSS

Rashtriya Swayamsevak Sangh (RSS) hotu Indresh Kumar chuan India rama mipui thinrimin dan loa mi an sawisak hlum ṭhin chu bawng talh tihtawp a, bawngsa ei bansan a nih chauhin a reh thei dawn niin a sawi.

Nimina Ranchi-a Jagran Hindu Manch hawnna inkhawma thu a sawiah RSS hotu hian he thu hi a sawichhuak a ni. "Mipuiten tharum thawhna an thlen ṭhin hi fak tur a ni lo, mahse hetihlai hian eng sakhua mahin bawng talh a phalsak lo a ni", a ti. "Kristiante rindanah pawh Isua kha bawng-ina piang a ni. Bawng talh hi sual a nih vangin Mecca-Madina ah pawh khap a ni bawk. He sualna laka kan fihlim chauhin dan loa intihhlumna thleng ṭhin hi a tawp chauh ang", a ti.

July17-a BJP hnuaia ṭhalai pawlten Hindu chungchanga sawiseltua puha social activist Swami Agnivesh an sawisak chungchang pawh Kumar hian a sawichhuak bawk. Kumar chuan activist Agnivesh sawisak a ni chu a dem thu a sawi a, mahse tumahin freedom of expression an neih chhuanlama hmangin midang rinna sawisel leh an rilru ti na zawnga thu sawi turin dikna an nei chuang lo a ni, tiin a sawi. Sakhaw dang betutte rilru ti na zawnga che ṭhinte hremna na tak siam a ngaih thu a sawi bawk.