Maratha quota phuta nawrhnaah mi pahnih intihhlum tum

Maharashtra state pumah nimin khan Maratha Kranti Morcha chuan sorkar leh zirna ina Maratha quota pek phutin nawrh an huaihawt.

Nawrh huaihawt hian Aurangabad district leh Marathawada bialte a nghawng buai zual a, school leh college te khar an ni. Nawrh huaihawtnaa tel mi pahnih chuan an thil phut nawr nan intihhlum an tum a, mahse chhan hman an ni a, damdawi-inah hruai nghal an ni.

Maratha quota pek phuta nawrh huaihawtte hian police leh fire deparment-te motor te an halsak a, venhim hna thawktute chu lungin an tawng bawk.

Official-te chuan venhim hna thawk tur hian local police-te bakah State Reserve Police Force (SRPF) battalion pasarih tirh chhuah an nih thu an sawi.

Thuneitute chuan nawrh huaihawt denchhena social media-a thu dik tawk lo thehdarh ṭhin venna turin nimin khan Aurangabad district-ah chuan internet service an titawp a ni.

Mumbai, Thane leh Navi Mumbai-ahte chuan nawrh huaihawt ni mah se dawr, school leh college hawn vek a ni a, public transport pawh a nghawng buai lo nia sawi a ni.