Cabinet-in hmeichhe pasal neih theih kum tihsan rawtna pawm

Union cabinet chuan Nilaini khan danin hmeichhiate pasal neih theih kuma a pawm, kum 18 aṭanga kum 21-a tihsan rawtna chu a pawm.

Prime minister Narendra Modi chuan nikum, kum 2020 Independence Day lawmnaa thu a sawiah khan he rawtna chungchang hi a lo sawilang tawh a ni. "Sorkar chuan hmeichhiate hriselna dinhmun chu a dah pawimawh a, fanuten an taksa tana ei tur ṭhate an neih a, kum dik taka pasal an neih hi a pawimawh a ni," tiin a sawi. Pasal neih theih kum tihsan rawtna ennawn a nih thu a sawi aṭanga kum khat hnuah he rawtna hi pawm a ni ta a ni.

Nupui/pasal neih theih kum hman mekah chuan hmeichhia kum 18 leh mipa kum 21 a ni.

Sorkar laipui hian Prohibition of Child Marriage Act, Special Marriage Act leh Hindu Marriage Act thlak tumin ruahmanna a kalpui mek bawk.

Hmeichhiate pasal neih theih kum tihsan rawtna hi Jaya Jaitly kaihhruai, NITI Aayog task force chuan a thlawp a ni. Task force hi nikum June thlaa din kha niin, member zingah hian Health Ministry, Ministry of Women and Child Development leh Law Ministry senior official-te bakah sorkar lama top expert VK Paul-te an tel.

Nikum December thla khan rawtna hi sorkarah thehlutin, hmeichhiate chu pasal neiha nau an pai hmasak berah kum 21 tal an tling tur a ni, tiin an sawi. Pasal neih theih hun tihsan hi sum, khawsak leh hriselna leh fate thleng pawhin nghawng ṭha zawk a siam zawk dawn a ni, an ti.

Jaya Jailty chuan he rawtna an siam dawn hian mithiam hrang hrangte an kawm kual bakah, ṭhalai, a bikin hmeichhiate pawh an kawm kual tih a sawi. University 16 aṭangin zirlaite ngaihdan an la a, hei bakah NGO 15 chuangte hmangin thingtlang lam leh mi rethei zawkte zinga ṭhalaite ngaihdan pawh an zawt kual tih a sawi. Population control tumna a ni loa, hmeichhiate thuam chakna zawk tura he rawtna hi siam a nih thu a sawi.

Aadhaar leh Voter ID thlunzawmna tur pawm
Cabinet meeting hian electoral law siamṭhat rawtna pawh pawmin,hetah hian voter ID leh Aadhaar thlunzawmna tur pawh a tel a, hei hi electoral roll-a dik lo taka ziahluh awm ṭhin venna tura tana tih a ni.

Representtion of the People Act siamṭhatna tur draft bill-ah hian voter list-a ziahluh thar turte kum enna atana January 1 chauh hman ṭhin chu April 1, July 1 leh October 1 te hman tel rawtin, vote nei ziah luh thar hi kum khatah ṭum li buatsaih theih a ni tawh ang.

Unique Identification Authority of India (UIDAI) hotu hlui, Ajay Bhushan Pandy chuan cabinet-in voter ID leh Aadhaar thlunzawm rawtna an pawm chu thil lawmawm tak a ni tih sawiin, hei hi voter leh Election Commission (EC) tan a pawimawh a ni, ati. He rawtna hi UIDAI hotu a nih lai aṭanga an nawr ṭan a ni.

Aadhaar leh voter ID thlunzawm hi tihluihna ni loin, mahse remtihna anga kalpui a ni dawn a, mahniin online emaw, phone hmangin emaw an thlunzawm tir thei dawn a ni. He ruahmanna hian inthlan felfai leh langtlang zawka kalpuina turah pawh a pui hle dawn a ni.