India ramah Covid-19 kai Nuai 3.43 chuang awm tawh

Hripui lengin ziaawm lam a pan thei lo a, nimina Ministry of Health and Family Welfare ministry report-ah chuan hri kai hmuh chhuah thar 10,667 awmin mi 3,43,091-in nimin thleng khan Covid-19 an kai tawh a ni.

Nimin thleng khan hri kai enkawl dam 1,80,013 an awm tawh a, hri kai mek 1,53,178 an awm bawk. Darkar 24 chhungin mi 10,215 enkawl dam an nih laiin thi 380 an awm leh a, hri len ṭantirh aṭanga nimin thleng khan mi 9,900 hripui vangin an thi tawh. 

MoHFW chuan report an tihchhuahah enkawl dam rate chu 52.46% a ni tawh tih an tarlang a, ni eng emaw zat chhung chu hri kai mek aiin enkawl dam hi an tam tawh zawk a ni. 

Indian Council of Medical Research (ICMR) chuan ni khatah Covid-19 sample 1,45,935 an endik thei tawh a, heti hian hri len ṭantirh aṭanga nimina report an tihchhuah thleng hian mi 59,21,069 chu an endik tawh. Laboratory an pawmpui zat pawh a pung zel a, 907 awm tawhin sorkar laboratory 659 leh private labo­ratory 248-ah Covid-19 swab sample a test theih tawh a ni. 

Ram chhungah Covid-19 kai thar an pun chhoh mek karah, Prime minister Narendra Modi chuan nimin khan chief minister-te meeting a neihpui a, vawiinah meeting hi an nei chhunzawm leh ang. 

Nimin tlai dar 3 khan PM hian state leh UN 21-a chief minister, lieutenant governors leh administrator-te chu video conference a neihpui a ni. Nimin meeting tel zingah hian Punjab, Kerala, Goa, Uttrakhand, Jharkhand leh hmarchhak state CM te an tel. 

PM hian ram chhunga hri leng vanga kharkhipna kalpui a nih hnuah CM-te meeting a neihpui ṭum rukna a ni a,  meeting an neih hnuhnun ber chu May 11 kha a ni.  Vawiinah state 15 leh Jammu and Kashmir LG-te meeting a neihpui leh dawn a, he hunah hian Delhi bakah Maharashtra, West Bengal, Karnataka, Gujarat, Bihar leh Uttar Pradesh CM te pawh an tel dawn.

Meeting-ah hian ram chhunga hri leng mek chungchangte an sawiho bakah, hri dona kawngah hma lak zel dan turte sawiin, rawtna hrang hrangte an siam a ni.