US-in India tan ventilator 100 a pe

India rama US Ambassador Kenneth I Juster chuan nimin khan New Delhi-a Indian Red Cross Headquarters-ah US Agency for International Development (USAID) kaltlanga US-in India tana ventilator 100 a pek chu a hlan. 

He ventilator hi US-based firm Zoll siam chhuah a ni a, ventilator hi Covid-19 hri kaite tana enkawlna kawnga ṭanpuina tura tih a ni. May 16 khan US president Donald Trump chuan India chu ventilator pek a nih tur thu hi a lo sawi tawh a ni.

President Trump chuan India chu US ṭhianṭha a nih thu leh he hri dona kawnga hnehna an chan tur thu a sawi. Prime minister Narendra Modi chuan Trump hnenah lawm thu a sawi a, hripui leng mek do turin ram hrang hrangte thawhho a ngaih thu a sawi.