Dan loa insawisak rawn veng turin state sorkar hrilh

Tunlaiin ramchhung hmun hrang hrangah mipuite thinrimin dan loa mi an sawisak rawn leh sawisak hlum a thleng fo a, hetiang thil hi a thlen tawh lohna tura hma la turin sorkar laipui chuan state sorkarte a hrilh.

Sorkar laipui chuan dan loa insawisakna thleng tur veng tura hma la turin district tinah police officer, superintendent level kaihhruaiin special task force din turin a ti. Anni hian social media-a thu thehdarh ṭhinte ngun taka vilin, dawt thu thang hmanga naupang ruk ching leh bawng tawlhrua tia inpuhna avanga insawisakna thleng ṭhin pawh an veng thei dawn a ni.

Union Home Ministry chuan police officer leh district thuneituten thuthang dik lo vanga insawisakna leh pawikhawihna thleng an veng zo lo a nih chuan an hnaa inthlahdah leh hna thawk ṭha loa ngaiin, official-te chungah chuan na tak action lak tur a ni, a ti. Hemi chungchanga hriattirna hi Supreme Court thupek angin July 17 khan state leh Union territory-te hnenah thawn a lo ni tawh bawk.

State leh UT tina chief secretary leh DGP-te hnena lehkhathawnah, "Tharum thawhna leh insawisak rawnna thleng hi naupang ruk ching, rukru, bawng tawlhru tih chungchanga thu dik tawk lo leh finfiahna awm lo thehdarh vanga thleng a ni fo a ni a, hei hi ngaihven a ngai hle a ni. Hetianga thu dik lo thehdarh tu leh, mahni thu dan loa lekkawhtute thiltih hi dan kalh tlat a ni. State leh UT sorkar tinte leh an state-a dan kengkawhtute chu Supreme Court thupek hi a taka kalpui tura ngen an ni. An hma lak dan reprot kimchang chu ministry hnenah a rang thei ang berin an thehlut tur a ni" tiin ministry chuan a tarlang. Hei hi thla khat chhunga hriattirna an pek vawi hnihna a ni.

Union home minister Rajnath Singh-a kaihhruai Group of Ministers (GoM) leh Union home secretary kaihhruai committee chuan dan loa insawisakna thleng ṭhin ven dan tur siam tur hian rawtna an lo siam tawh bawk. Singh chuan Thawhlehni-a Parliament rorel inkhawmah hetiang pawikhawihna thleng ṭhin veng tur hian a ṭul a nih chuan sorkarin dan a siam tur thu a lo sawi tawh bawk.