David Headley-a ukil-in a dinhmun sawifiah

Kum 2008-a Pakistan firfiakten Mumbai khawpui an beih ṭuma inhnamhnawih leh mawhphurtu zinga puha thiam loh chantir, Pakistani-American David Headley-a ukil chuan Headley-a ICU-a enkawl mek ni anga India media-ten an sawi chu thu dik lo a ni tih a sawi.

Headley hi July 8 khan a tanna, Chicago-a detention centre-ah a tanpui mi pahnihin beiin hliam na tak a tuar a, North Evanston hospital panpui a nih hnuah ICU-ah dah luh nghal a ni tih media report chuan an tarlang a ni. Mahse Headley-a ukil, John Theis chuan hei hi thu dik lo a nih thu sawiin, Headley hi damdawi-inah a awm lo a, Chicago-ah pawh a awm lo bawk niin a sawi. Theis chuan Headley nen hian a inbe pawp reng tih a sawi a, mahse a awmna leh a dinhmun dik tak erawh a sawilang duh lo. US leh India-a thuneitute pawhin Headley chungchanga media report hi an sawi fiah duh lo bawk.