Congress-in Rafale deal chhui chiangtu panel din phut

Congress party chuan Prime Minister Narendra Modi-a kaihhruai sorkar leh France-in Rafale fighter jet leina tura inremna an siam zirchiangtu tur Parliamentary Joint Committee din leh, thil awmdan dik tak puanzar an phut thu a sawi.

Congress hruaitu Mallikarjun Kharge-i chuan, "Bofors case-a an lo tih tawh ang khan Parliament Joint Committee hi din a, Rafale jet deal chungchang thil awmdan dik tak puanzar a ni tur a ni. Inremna siam hi a hma aia tlawm zawka an lo siam thei a nih chuan PM khan no-confidence motion lai khan a sawichhuak tur a ni", a ti.

Kharge chuan Rafale deal chungchangah rorellai BJP chuan mipuite chu thu dik tawk lo a hrilh niin a puh bawk. BJP-ten he inremna chungchanga thu chhuah an siamte chu an eirukna thupbo an tumna mai a ni tiin a sawi.

Congress hruaitu chuan PM Modi-a East Africa ram a tlawh kual chungchang pawh a sawisel bawk. "Parliament session neih mek laiin PM chu ni nga thang turin a zinchhuak a ni. Hei hi pumpelh theih a ni. Mahse Parliament-ah majority an neih vangin session-a tel loa foreign ram tlawha zin hi a thlang zawk a ni", a ti.

France chuan India nena Rafale leina tur inremna an siam chungchang information-te chu an inremna siama thup a nih tur thu a sawi a, hei vang hian Congress chuan PM Modi leh Defence Minister Nirmala Sitharama-i te lakah provilege motion putluh an tum thu a lo sawi tawh a ni. Congress hruaitu leh Defence minister hlui AK Antony chuan aircraft lei tur hi a man zat puangzar turin sorkar a phut thu a sawi.