Sonia-i'n fuel man sang chungchangah PM Modi lehkha thawn

Congress president Sonia Gandhi chuan ram chhunga fuel man sang chungchangah prime minister Narendra Modi chu lehkha a thawn a, a man tihsan chhanna tur a awm loh thu a hriattir.

A lehkha thawnah hian Sonia chuan international-a crude oil man a tlakhniam thu leh kar liam ta phei kha chuan 9% vela a tlakhniam thu a sawi. Hei vang hian ram chhunga fuel man tihsan chhanna tur a awm loh thu PM Modi chu a hriattir ta a ni.

Sonia chuan Covid-19 hri leng vangin ram chhunga mipuiten harsatna an tawh chho mek thu leh, he hri leng hian hna thawhna kawngah a chhe zawnga nghawng a neih thu a sawi a, mi ṭhenkhat chu ei zawng tura hna an thawh theih loh thu leh hna chan tam tak an awm thu a sawi bawk. Hengte avang hian mipuiten harsatna an tawk mek a, hetih laia sorkar laipuiin fuel man a tihsan chu a dem thu leh, harsatna tawk mek mipui aṭangin hlawkna dik lo tel a tum tih lehkhaah hian Sonia chuan a sawi.

Kum ruk liam ta chhungin sorkarin fuel man a tihsan fo thu Sonia chuan a sawi a, petrol leh diesel man pawh ṭum 12 ngawt sorkar laipui chuan a man a tihsan thu a sawi a, petrol man hi 258% laia a san tawh thu leh diesel hi 820% laia a san thu a sawi. Sorkar laipui chuan fuel man a tihsan vang hian cheng vaibelchhe 2,60,000 vel pawisa a lak belh theih thu Sonia chuan a sawi bawk.