Ni 74 chhung positivity rate 2% hnuai lamah awm tawh

India ramah Ningani khan Covid-19 hri kai thar 7,447 an awm belh leh a, hri kai hmuh chhuah tawh hi 3,47,26,049 an tling tawh a ni.

Ni tina hri kai thar, daily positivity rate hi 0.59% a ni a, ni 74 chhung chu 2% hnuai lamah a awm tawh. Kar khata hri kai hmuh chhuah, weekly positivity rate pawh 0.63% niin ni 33 chhung chu 1% hnuai lamah a awm tawh bawk.

Hri kai mek, active case pawh an tlahniam zel a, nimin zing dar 8 thleng khan ram pumah active case 86,415 an awm mek. Hri kai mek hi hri kai hmuh chhuah tawh aṭangin 9.25% a ni a, nikum March thla hnua a hniam ber ṭum a ni.

Hri kai enkawl dam an pung zel a, 98.38% tling tawhin nikum March thla hnu lama a san ber lai a nih thu union health ministry chuan a tarlang.

Ningani khan Covid-19 vanga thi mi 391 awm lehin, he hri thihpui hi mi 4,76,869 an tling tawh. Hri thihpui, fatality rate hi 1.37% a ni a, hetih lai hian hri vanga thi zinga 70% hi natna dang nei sa nia sawi an ni thung. Ningania hri vanga thi mi 391 zinga 320 hi Kerala state-a mi niin, Maharashtra-ah mi 19 in an thihpui bawk.

Ram puma hri vanga thi, mi 4,76,869 zinga 1,41,317 hi Maharashtra state-a mi an ni a, Kerala state-ah mi 43,946 in thihpui tawhin, Karnataka-ah 38,279, Tamil Nadu-ah 36,656, Delhi-ah 25,100, Uttar Pradesh-ah 22,915 leh West Bengal-ah mi 19,645 chu Covid-19 vangin an thi tawh bawk a ni.

Nimin zing dar 8 thleng khan India ramah Covid hri chi thar, Omicron variant kai hmuh chhuah mi 83 an awm tawh. An zinga 32 chu Maharashtra-ah hmuh niin, Rajasthan-ah 17 an awm bawk. India ramah Omicron variant hi nakkum January-February thla hian a darh chhoh rin a ni a, mahse mithiamte chuan he variant kaite hian an lak nat a rinawm lo niin an sawi.

Delhi-ah hri kai pung thar leh
Delhi khawpuiah Ningani khan Covid-19 hri kai mi 85 an awm thar leh a, thla li hnua ni khata hri kan an tam ber ṭum a ni. Positivity rate pawh 0.15%-ah a kai chho leh a ni.

Delhi health minister Satyendar Jain chuan Delhi-ah Omicron variant kai 10 hmuh chhuah an ni tawh a, mahse an zingah hian ngaihtuahawm an awm lo tih a sawi. Omicron kai nia rinhlelh mi 40 chu Lok Nayak Hospital-a special facility-ah khung hran mek an ni tih a sawi bawk.

Hri len tirh aṭangin Delhi khawpuiah hian Covid-19 kai hmuhchhuah hi mi 14,41,935 an awm tawh a, an zinga nuai 14.16 chu enkawl dam an ni tawh. Ningani thleng khan hri kai enkawl mek hi 475 an awm a ni.

Vaccine dose vbc 136 dawn sem chhuak tawh
Ram pumah Covid-19 vaccine dose vaibelchhe 134 dawn sem chhuah a ni tawh. Ningani bik khan mi nuai 62.90 hnenah vaccine pek a ni.

Union health ministry-in a tarlan danin, vaccine dose khatna hi vaibelchhe 82.25 pek a ni tawh a, dose kima la vaibelchhe 53.65 an awm tawh bawk.

Covid-19 vaccine hi January 16 aṭang khan semchhuah ṭan niin, a thawh khatnaah healthcare worker te pek niin, February 2 aṭangin frontline worker-te pek an ni ve leh a ni. March 1-ah kum 60 chung lam leh kum 45 chin, natna benvawn neite hnenah pek ṭan a ni a, April 1-ah kum 45 chunglamte pek an ni bawk. Ram pumah May 1 aṭang khan kum 18 chinte hnenah vaccine hi pekchhuah a ni leh.