Tamil Nadu-in state anthem tur puang ; Anthem sak laiin mipuite ding vek turin ti

Tamil Nadu sorkar chuan state anthem atan 'Tamil Thai Vazhthu' a puang.

State sorkarin thupek a tihchhuahah, state anthem hi school, college,university leh sorkar office-a function buatsaihah, inkhawm ṭannaah sak/play ziah a ni ang. State anthem sak emaw, play emaw a nih lai hian taksa lama harsatna nei tih lohte chu an awmna hunah ding vek tura tih an ni. 'Tamil Thai Vazhthu' hi Mother Tamil fakna hla a ni a, second 55-a thui a ni.

Madras High Court chuan 'Tamil Thai Vazhthu' hi ṭawngṭaina hla a ni a, he hla sak/play laiin mipuite chu an awmna hmuna ding vek tura tihna thupek a awm lo a, National Anthem a nih loh avangin mipuite tan din kher a ṭul lo tiin a lo sawi tawh a ni. Mahse court-in he thutlukna a siam hnuah Tamil Nadu sorkar chuan thupek hi tichhuakin, he hla sak a nih chhung chuan mipuite chu ding vek turin a ti ve leh thung a ni.