India-China ramria sipai intihbuainaah India sipai pathum an thi

Ladakh khawchhak lam, Galwan Valley-a Thawhṭanni zana India leh China sipaite inkara buaina chhuakah India sipai pathum an thi a, an zingah hian colonel pawh a tel.

Tun hnaiah India-China ramriah ram pahnih sipaite inkar boruak hi a ṭha lo hle a, a hma pawhin an in lo intibuai tawh a ni. Mahse ramria an intihbuai vanga thihna thleng hnuhnung ber chu kum 1975 daih tawhah khan a ni. 

Thawhṭanni zana Line of Actual Control (LAC)-ah ram pahnih sipaite an intihbuainaah hian China lam sipai zingah pawh thi an awm niin Indian Army chuan a sawi a, mahse report kimchang erawh hriat a ni lo. 

Thawhṭanni zana ram pahnih sipaite intihbuaina chhan tak hi sawichian a la awm lo a, mahse silai erawh an hmetpuak lo nia sawi a ni. Sipaite hi lungin an intawng a, India sipai pathum thi te pawh hi lungin vawm fuh an nih vanga thi nia sawi an ni. 

Sipaite inkara boruak siamṭhat tumin nimin khan ram pahniha sipai official-te chuan meeting an nei nghal. Mahse hemi chungchangah hian Army lam chuan thuchhuah engmah an nei lo. 

Defence minister Rajnath Singh pawhin foreign minister Dr S Jaishankar, chief of defence staff General Bipin Rawat leh service pathum hotute chu nimin khan meeting neihpuiin, ramria thil thleng hi an sawiho a ni. 

Ramria intihbuaina thleng vang hian Indian Army hotu General Manoj Mukund Naravane-a'n nimina Pathankot tlawh a tum pawh a ṭhulh nghal bawk.