West Bengal-in state hming 'Bangla' tia thlakna tur pawm

West Bengal assembly chuan nimin khan an state hming, 'Bangla' tia thlak rawtna chu a pawm. State hming thlak tur hian sorkar laipui pawmpuina an la mamawh leh dawn a ni.

West Bengal hming, 'Bangla' tih hminga thlak rawtna hi state chhunga party hrang hrangte chuan an pawm a, eptu party Left, Congress leh BJP pawhin an pawmpui a ni. Bangla tia hming thlak hi kum 1999 khan Left party sorkar chuan a lo rawt tawh a ni.

Kum hnih liamta khan Chief Minister Mamata Banerjee-i kaihhruai Trinamool Congress sorkar chuan an state hming hi chi thum -Bengali ṭawnga Bangla, Hindi-a Bangaal leh English-a Bengal tia thlak a lo rawt tawh a, mahse sorkar laipui chuan state pakhatin hming hran pathum a nei thei lo ang tiin hming pakhat chauh thlang tura tiin he rawtna hi a lo hnawlsak tawh a ni. Tun

ṭumah hian hming pakhat, Bangla tih chauh chu an thlang ta a ni.

CM Mamata Banerjee-i hian an state hming thar tur hi hun eng emaw chen a lo buaipui tawh a ni. Hming a thlak duhna chhan pakhatah chuan hawrawp indawt dana state list siamah West Bengal hi a hnuhnung berah a awm a, hei vang hian meeting neihah te an state CM hi a tawp berah hun pek a ni chauh ṭhin nia sawi a ni.

State hming thar atan 'Bangla' tih an thlan hi tualchhunga zu an siam sawina atana hman a nih avangin mi ṭhenkhat chuan an duh vak lo nia sawi a ni. West Bengal state hi Bengali ṭawnga 'Paschim Bang' leh 'Paschim Bangla' tih a ni. Kum 2011 khan Buddhadeb Bhattacharjee-a kaihhruai Left sorkar chuan 'Paschimbanga' tia an state hming thlak hi a lo tum tawh a, mahse an pawmsak an ni ta lo a ni.

Kum 1947 Partition-ah khan hetih laia British province, Bengal chu hmun hnih–West Bengal, India lama bet leh East Pakistan (East Bengal tia sawi ṭhin), Pakistan tana betah ṭhen an ni. East Pakistan hi kum 1971 khan Bangladesh tih a ni a, hetihlai hian India ram lama bet zawk chuan West Bengal tih hming hi a pu chhunzawm ta zel a ni.