Loneitu hruaituin political party thar din Punjab assembly inthlanah chuh an tum

Loneitu hruaitu, Gurnam Singh Chaduni chuan kar liamta Inrinni khan political party thar a din a, an party hming hian nakkuma Punjan assembly inthlanah chuh an tum tih a sawi nghal bawk.

Chaduni chuan Chandigarh-ah a party din thar, Sanyukt Sangharsh Party hi puangin, an tum ber chu politics then thianghlim leh mipuite tana thil ṭha tih a nih thu a sawi.

Sorkar laipuiin farm law pathum a siam duh lohna lantira kum khat chuang zet nawrh huaihawt, ram chhunga loneitu pawl 40 inzawmhawm, Samyukta Kisan Morcha (SKM)-ah Chaduni hi member a ni a, Haryana Bhartiya Kisan Union president a ni bawk.

Punjab assembly inthlanah hian an party thar hming hian chuh ve an tum thu sawi mah se, Chadunin chuan amah chu inthlanah hian din a tum loh thu a sawi. Party dangte nena an thawhdun dan tur chungchangah tun maiah chuan thuthlukna siam la ni lo mah se an party chuan Assembly seat awm zawng zawng zat seat 117 chu chuh vek an tum tih a sawi.

State chhunga farming sector lamah danglamna thlen a tum dan sawiin, hnathawh tur tam zawk siam belh leh international market lama hralh tla tur pangpar lam ching tura hmalak an tum tih a sawi bawk.

Punjab-ah opium farming kalpui a duh thu a sawi a, "Opium farming hi phal a nih chuan Punjab hian hmasawnna tam tak a neih phah dawn a ni" a ti.

Political leader-te sawiselin, policy an siamah mirethei zawkte hlamchhiahin, mi hausa zawkte tana hamṭhatna siam zawk ṭhinah a puh. Mi hausaten ram an thununna kawnga mawhphurtu chu politics a ni a, hemi rual hian mipui nawlpui tan an mamawh hmuhchhuah pawh thil harsa tak a ni thung tiin, Chaduni chuan ram kalphung thlak danglam a, ram mipui suamtute chu paihthlak an ngai a ni, a ti .

Sanyukt Sangharsh Party chu sakhaw thlei bik nei lo leh vantlang mipuite ṭhatna tura hnathawktu tur a ni, tiin Chaduni chuan a sawi.