Maha CM-in all party meet a ko

Maharashtra Chief Minister Devendra Fadnavis chuan an state chhunga Maratha quota pek phuta nawrh huaihawtnaa tharum thawhna te a thlen hnuah, an buaina chinfel dan ngaihtuah turin vawiin hian all-party meet a ko.

Cabinet minister Chandra-kantdada Patil chuan CM hian political party hrang hranga hruaitute chuan vawiin hian meeting nei turin CM hian a ko tih a sawi. CM hian Maratha reservation phuttu pawl hrang hrang aiawhte pawh a be mek a, meeting neih turah pawh tel tura sawm an ni dawn tih a sawi.

Ningani zan khan state chhunga Maratha quota phut chungchang ngaihtuah hian CM kaihhruaiin meeting neih ani a, he hunah hian BJP hruaitute leh senior minister-te an tel. Meeting zawhah chanchin thar lakhawmtute a kawmnaah Maharashtra BJP president Raosaheb Danve chuan Maratha reservation chungchang chu a rang thei anga ngaihtuah an rel tih a sawi. BJP leh state sorkar chuan Maratha quaota siamsak chu a thlawp tih sawiin, court-ah an rawtna neihte pawh an thehluh thuai tur thu a sawi.

CM Fadnavis pawhin BJP sorkar chuan Maratha-te reservation pek ngei a tum tih a lo sawi tawh bawk. Court-ah thil tihfel hnuah Maratha hnam pual hian sorkar hna leh zirna-inah 16% reservation pek tum a nih thu state sorkar chuan a sawi a ni.

Maratha quota phuta nawrh huaihawtte an thlawpna lantir nan MLA panga chuan banna an thehlut tawh bawk. Banna thehlutte chuan CM Fadnavis hian ṭawngkam leh ziak ngeiin reservation pek a lo tiam tawh a, mahse tun thlengin he a thutiam hi a ngai pawimawh tawk lo niin an sawi.