No detention policy titawp ; Class 5 leh 8 zirlaite fail tir phal a ni dawn

Lok Sabha chuan Right to Education Act siamṭhatna tur Bill chu a pawm a, he bill siamṭhatah hian no detention policy chu tihtawpa ni a, Class 5 leh 8 zirlaite chu fail tir phal an ni tawh dawn a ni.

Kum 2010 aṭanga hman, Right to Education Act-a Section 16 hnuaiah zirlai, Class 8 hnuai lam chin chu fail tir phal loh an ni. Mahse Ningani-a he bill siamṭhatah hian fail tir khapna, no detention policy hi paih a ni ta a ni.

He dan siamṭhat hnuaiah hian zirlai, exam-naa fail-te chu additional instruction pein exam ṭhat tir leh an ni ang. Exam nawn tirnaa an la fail leh a nih chuan a class ngaia awm nawn tir tur nge, pawl sawn tir tur tih chu state sorkarin thutlukna a siam tawh zawk dawn a ni.

House-a bill sawihona-ah Union Human Resource Development Minister Prakash Javadekar chuan education system siamṭhat a ngaih thu a sawi a, zirtirtute training pek ṭhat te, zirna ṭha leh rintlak pekte chu thil pawimawh tak a ni, a ti. Education system chu a bulṭhut aṭanga ngaih pawimawh a ngai tih sawiin, primary education chuan ngaihpawimawh a hlawh tawk lo nia a ngaih thu a sawi.