BRICS: PM Modi-an international trade zalen leh felfai tiam

South Africa-a BRICS (Brazil, Russia, India, China and South Africa) summit vawi 10-na neihah Ningani khan Prime Minister Narendra Modi chuan thu a sawi a, international trade zalen leh felfai taka kalpui a tiam.

Summit hi Johannesburg-a Sandton Convention Centre-ah neih a ni a, PM hian plenary session-ah thu sawiin, 4th industrial revolution-ah chuan talent a pawimawh thu a sawi a, India chuan BRICS ramte chu thawhpuina nghet leh ṭha zawk neihpui a duh thu pawh a sawi.

Kumina summit thupui hi 'BRICS in Africa–collaboration for inclusive growth and shared prosperity in the 4th industrial revolution,' tih a ni. Modi chuan industrial revolution chuan industrial production, design leh manufacturing field-ah inthlak danglamna nasa tak a thleng dawn tih sawiin, a kaihhruai sorkar chuan khawtlanga ngaihsak hlawh lo zawkte chu eizawna leh zirna lama thuam chak a tum thu a sawi. Hna zawngtute chu hna siamtute zawkah siam tum a ni tih a sawi a, mahse hemi tihlawhtling tur chuan education leh skill development lamah thil thlak danglamna nasa tak a thlen a ngai a ni, a ti.

Ni thum summit hi Nilaini khan neih ṭan niin, nimin khan an zo a ni.

Meeting denchhen hian Modi chuan ramdang hruaitute pawh meeting a neihpui a, China President Xi Jinping leh Russia President Vladimir Putin te chu meeting a neihpui a, anni bakah hian Turkey President Recep Tayyip Erdogran, Argentina President Mauricio Macri leh Angola President João Lourenço te pawh a kawm dawn bawk.