Gangster Abu Salem-an Sanju film siamtute legal notice a pe

Kum 1993-a Bombay-a bomb tihpuahnaa mawhphurtua puha damchhung tang tura hrem, gangster Abu Salem chuan Bollywood movie 'Sanju' siamtute chu he film-ah hian a chungchang thu dik lo taka tilanga puhin legal notice a pe.

Salem hian a lawyer kaltlangin movie siamtute hnenah hian a chanchin dik lo taka tilanga puhin, thupha chawi turin a phut bawk. Movie siamtute hi legal notice a pek chhang tur hian ni 15 hun a pe a, hemi chhunga thupha chawina an siam loh chuan an laka defamation case thehluh a tum thu a sawi. Legal notice-ah hian movie siamtu Raju Hirani, Vidhu Vinod Chopra leh midang eng emaw zat hming tarlan a ni.