Eptu party-te'n meeting nei tura sorkar sawmna hnawl ; Eptute ṭhendarh tumah sorkar an puh

Rajya Sabha-a eptu party MP 12-te suspend an nih avangin hun rei tak rorel mumal thei loin an awm tawh a, sorkar laipui chuan hemi avanga an buaina chinfel dan tur ngaihtuaha inbiakna neihpui turin eptu party panga a sawm. Mahse eptu party-te chuan party ṭhenkhat chauh meeting nei tura sawmna hi duh loin an hnawl.

Pathianni khan sorkar laipui chuan MP hrem mekte awmna party, party panga-te chu inbiakna neihpui tur hian a sawm a ni. Mahse Rajya Sabha-ah hian eptu party 15-te chuan MP hremte hi lakluh phut hian session neih tir aṭangin an lo nawr tawh a, inbiakna neih turah party zawng zawng aiawhte sawm tel an nih loh avang hian sorkar sawmna hi an pawm duh lo.

Nimin zing khan eptu party hruaitute chuan sorkar sawmna chungchang hi an ngaihtuah hnuah, meeting-a tel loh hi an rel a ni. Shiv Sena hruaitu Sanjay Raut chuan meeting-ah an tel dawn lo thu hi sawiin, heng MP 12-te hremna hi sut tura an phut chhunzawm zel tur thu sawiin, an thil phut hi tihhlawhtlin a nih loh chuan Parliament in hnihte chu rorel thei loin an tihbuai zel tur thu a sawi bawk.

Communist Party of India hruaitu, Binoy Viswam pawhin party ṭhenkhat chauh sawm an nih chu sawiselin, hei hi sorkar laipuiin epty party-te ṭhendarh a tumna hmanrua a ni, a ti.

Rajya Sabha-a leader of opposition, Congress MP Mallikarjun Kharge pawhin party ṭhenkhat chauh sawm an ni chu thil dik lo tak a ni, tiin hei hi eptu inlungrual lo tura ṭhendarh a tumna a ni tiin, all-party meeting ko turin a phut.

Union parliamentary affairs minister Pralhad Joshi chuan meeting nei tur hian Congress, Trinamool Congress, Communist Party of India (Marxist), Communist Party of India leh Shiv Sena-te a sawm a ni.

Rajya Sabha chairman M Venkaiah Naidu chuan eptu party-ten lungawi lohna lantira rorel inkhawm an tihbuai reng avangin hemi chungchang hi chinfel thuai a ngai tih a sawi. MP hrem takte chu thupha chawi turin an phut tih House Leader Piyush Goyal chuan a sawi bawk a, 'Thupha an chawi phawt chuan sorkarin an chungchang hi ngaihtuah ṭhat leh a inpeih reng a ni," a ti.

Mahse eptu lam chuan session liam ta, Monsoon session-a an thiltih avanga a dawt leh session-a MP-te hrem an nih dan hi dan kalh a ni tiin, hrem an nihna hi sut turin an phut chhunzawm zel dawn tih an sawi.