VHP-in sakhaw danga inleh khapna dan khauh zawk siam phût

Hindu pawl, Vishwa Hindu Parishad (VHP) chuan Pathianni khan sorkar laipui leh state sorkar te chu tihluihna, hlauhna emaw inbumna avang emawa sakhaw danga inleh luihtir khapna dan khauh zawk siam turin an phût.

Right-wing pawl hian Scheduled Tribe (ST) category-a awm, sakhaw danga inlet te chu an hamṭhatna dawn ṭhin tihtawpna tur dan siam turin an ngen bawk.

"State-te hian dik lo taka sakhaw inlehna leh 'love jihad' khapna dan ṭha tawk tak an nei lo a, ram mipuite leh society tana ṭhattlanna tur ngaihtuah chungin dan an siam a ngai a ni. Dan loa sakhaw danga inleh leh, firfiak pawl nena inkungkaihna awm ṭhin dante thlirin, sorkar laipui chuan a rang thei angin a venna tur dan khauh tak a siam thuai a ngai a ni," tiin VHP Central General Secretary Milind Parande chuan a sawi.

VHP hotu chuan, SC-te hi sakhaw danga an inleh chuan hamṭhatna an dawng zui thei lo a, mahse ram danpui chuan ST-te chu an dawn zui zel a phalsak thung. Hei tak hi misisonary-te chuan remchangah an rawn hmang ṭhin a ni, a ti.ST category-a mite pawh an hamṭhatna dawn ṭhinte tihtawp sak ve an nih theihna turin ram danpui chu siamṭhat thuai a ngai a ni, a ti.

Covid-19 hripui leng doa khawvel a buai laiin, Muslim sakhaw hruaitu (Maulvis) leh pastor-te chu midangte an sakhuaa hruai luh tumin an lo buai thung niin a puh bawk.

VHP hian missionary leh Muslim cleric ṭhenkhatten midangte an sakhuaa inleh tir tura an beihna leh hmalak dan duh lohna lantirin, December 20-31 chhungin rampum huapin 'Dharma Raksha Abhiyan', campaign neih an tum bawk a ni.