Gujarat-ah heroin Rs vbc 400 hu man

Gujarat khawthlang lam, India ram chin tuipuiah heroin kg 77 phurtu, Pakistan mite sangha manna lawng man a ni a, he lawnga chuang mi paruk man an ni bawk. Heroin an man hi international market-ah cheng vaibelchhe 400 vel hu a ni.

Ruihhlote hi Pathianni zana Indian Coast Guard leh Gujarat Anti-Terrorist Squad (ATS)-ten joint operation an neiha an man tih official chuan a sawi.

Gujarat defence PRO chuan heroin phurtu, Pakistan mi sangha manna lawng 'Al Huseini' man a nih thu twitter-ah pawh a tarlang a, he lawng hi chhui chian turin Jakhau tuipui kam aṭangin Kutch district-ah lak a ni tih a sawi bawk.

Kumin April thla khan, Coast Guard leh ATS-te chuan Pakistan mi pariat chuanna lawngah heroin kg 30, Rs vaibelchhe 150 man vel chu Kutch,Jakhau coast-ah an man a ni. Thla hmasa khan ATS chuan Gujarat, Morbi district-a insaknaah heroin, Rs vbc 600 hu an lo man tawh bawk a ni.

ATS chuan Pathianni zana ruihhlo an man hidrug dealer-ten Arabia tuipui kaltlangin India rama an thawhpuite an thawn a ni tih an sawi.

Kumin September thla khan, India rama ṭum khata heroin man tam ber ṭum thlengin, Directorate of Revenue Intelligence (DRI) chuan Afghanistan aṭanga rawn lut nia rin, heroin kg 3,000, global market-a Rs vbc 21,000 man bawr vel chu Kutch, Mundra port-a container pahnihah an lo mansak tawh bawk a ni.