Covid-19 vanga thi tam ber ni a thleng

India ramah hripui leng chuan ziaawm lam pan loin hri kai pun belh zel mah se, hripui leng vanga inkharkhipna kalpui chu thlahdul chhoh zel a ni a, nimin aṭang khan Unlock 2  kalpui ṭan a ni. 

Hetih lai hian Thawhlehni kha India ramah Covid-19 vanga thi an tam ber ni a ni a, mi 507 an thi a ni. Hemi ni vek hian hri kai hmuh thar mi 18,653 an awm bawk. A zawnin ni nga chhung chu hri kai hmuh thar hi 15,000 chuang zel an awm tawh.

Ram pumah hri kai hmuh tawh hi mi   5,85,493 an awm tawh a, an zinga 3,47,979 chu an dam tawh a, mi 17,400 in an thihpui tawh thung. Hri kai mek hi mi 2,20,114 an la awm. Hri kai dam leh, recovery rate hi 59.43% a ni tawh. Indian Council for Medical Research (ICMR) chuan June 30 thleng khan ram pumah Covid-19 sample 88,26,585  test ni tawhin, Thawhlehni bik khan sample 2,17,931 test a nih thu a sawi. Ram puma hri kai hmuh chhuah tawh zinga hmun thuma ṭhena hmun hnih chu Maharashtra, Tamil Nadu, Delhi leh Gujarat-a mi an ni. 

Delhi chief minister Arvind Kejriwal chuan Delhi khawpuia hri leng mek chu mitinte inpekna azarah thunun theih a ni chho tawh tih sawiin, ziaawm lam an pan tih a sawi. Hemi rual hian mipuite chu fimkhur tur te, mask vuah leh social distancing dante zawm chhunzawm zel turin a chah nghal a ni. 

Kejriwal chuan, "June 30-ah Dehli-a Covid-19 kai enkawl ngai chu mi 60,000 vel ni tura chhut lawk a ni a, mahse tuna hri kai mek awm zat hi 26,000 a ni thung a ni. Hei hi mitinte thawhrimna leh inpekna vang a ni," tiin press meet-ah a sawi. Union health ministry-in a tarlan danin, Delhi-ah hian hri kai hmuh tawh hi mi  87,360 awmin an zinga 58,348 chu an dam tawh a, thihpui  hi mi  2,742 an awm.