Naupangte vaccine pek an ngai rih lo : NTAGI member

National Technical Advisory Group on Immunisation in India (NTAGI) member, Dr Jayaprakash Muliyil chuan data aṭanga a landanin, naupangte hnenah Covid-19 vaccine pek hmanhmawh ṭulna a awm rih lo niin a sawi.

Dr Muliyil chuan sorkar laipui hnenah an ngaihdan hi hrilhin, hri leng mek karah naupangte dinhmun chu a la ngaihtuahawm lo a, vaccine pek hi an ngai rih lo a ni, a ti.

"India ramah Covid-19 hri vangin naupang kum 12 hnuai lam thi an la awm lo. Covid-19 vanga thi naupangte hi cancer, leukemia leh natna dang neite an ni a, heng mite thihna chhan hi Covid-19 vang a ni lo," tiin Vellore Christian Medical College professor leh India rama epidemiologist ṭha ber zinga sawi, Dr Muliyil chuan a sawi a ni.

Sorkar laipui hian naupangte vaccine pek dan tur chungchangah official-in thuchhuah engmah a la siam lo. October thla khan union health minister Mansukh Mandaviya chuan official-te hnenah naupangte vaccine pek hi hmanhmawh a ngai rih lo tih a lo hrilh tawh a ni.

Naupangte hnena Covid-19 pek runpui kalpui hmain thil awmdante lo zirchiang tur leh, an ngaihdante sorkara thlen turin NTAGI hi ngen an ni. Health Minister hian ram changkang zawkahte naupangte vaccine pek hna kalpui an hmanhmawh loh chhante chu zirchiang turin officer-te pawh a lo ngen tawh bawk.