LS-ah hmeichhe pasal neih theih kum tihsan chungchang sawiho

Hmeichhe pasal neih theih kum, kum 18 aṭanga 21-a tihsanna tur bill chu nimin Lok Sabha inkhawmah sawiho a ni a, he bill hi eptu party-te chuan an sawisel a ni.

Union Cabinet Minister for Women & Child Development, Smriti Irani chuan nupui/pasal nei theih kum inanga dah a, kum 21 ve vea bithliah rawtna, Prohibition of Child Marriage (Amendment) Bill 2021 hi House-ah a pharh a ni.

Minister chuan bill a pharh rual hian ram chhungah intluktlanna hi inneih phalsak kumah pawh hmuh a ngai a ni, a ti. Mahse eptu party-te chuan sawiselin, bill siamṭhatna tur ngaihtuahnaah hian sorkar chuan stakeholder tumah a rawn lo a ni, an ti. Tun ṭum hi sorkarin eptu party-te rawn loa a duh dan anga a siam bill a pharh ṭum thumna a nih thu National Congress Party (NCP) MP Supria Sule chuan a sawi. Bill hi standing committee hnenah zirchian tura thawn phawt an phut.

Congress MP Adhir Ranjan Chowdhury chuan hmanhmawh taka bill siamṭhat a ni chu a thlawp lo tih sawiin, he bill hi minority-te pawhin an duh lo vek tih a sawi. Bill siamṭhat dawn hian stakeholder-te rawn an ni vek tur a ni, a ti. Congress member dang Gaurav Gogoi pawhin law commission ngei pawhin he bill hi a thlawp lo a, hei vang hian standing committee-in a zirchian leh phawt a ṭul tih a sawi bawk.

AIMIM MP Asaduddin Owaisi pawhin hmeichhia kum 18 miten vote thlak a, prime minister an thlan theih laia pasal neih phalsak an ni lo chu fundamental rights kalh a ni, a ti.