NEP hnuaiah school-te Bhagwad Gita zirtir phalsak

Union minister for education Annapurna Devi chuan Lok Sabha-a zawhna a chhanah, New Education Policy (NEP) hnuaiah state sorkarte chu an state chhung school-ah Bhagwad Gita chu zirtir phalsak an ni tih a sawi, hei bakah hian state sorkarte chuan an duh chuan Bhojpuri ṭawng zirna pawh an siam thei bawk tih a sawi.

Minister chuan NEP hnuaiah hian zirlaite chu regional language zirtir ngei ngei tura tih an nih thu sawiin,"Zirna hi ram danpui hnuaia concurrent list huangah dah a ni. State te'n an duh chuan an curriculum-ah Bhagwad Gita an telh thei ang," a ti.

"CBSE (central board of secondary school education) pattern hnuaiah hian class ṭhahnem takah chuan Bhagwad Gita hi zirtir an ni tawh. State ten an duh chuan an belh thei ang" tiin Minister chuan Question Hour chhungin House a hrilh a ni.

North Mumbai BJP MP Gopal Shetty zawhna a chhannaah Minister chuan he thu hi a sawi a, "Bhagwad Gita-a thuziak ṭhenkhatte hi chu class 6, 7 leh 8-ah a awm tawh a ni," a ti.

Union education minister Dharmendra Pradhan pawhin Bhagwad Gita chu Yoga subject bikah UGC-NET examination syllabus-ah telh a nih thu a sawi bawk. "All India Council for Technical Education (AICTE) chuan kum 2018 khan UG Engineering courses model curriculum-ah Indian Traditional Knowledge System hi an lo telh tawh a, hetah hian Shrimad Bhagwad Gita ami ṭhenkhat a tel a ni," tiin a sawi.