LoC-ah Pakistan-in a sipai 20,000 dah

Jammu and Kashmir thlang lam, Pakistan nena inrina Line of Control (LoC)-a Gilgit-Baltistan hmunah Pakistan chuan sipai 20,000 vel a dah  niin India intelligence-te chuan an tarlang. India leh China ramri Line of Actual Control (LAC)-ah hian India ram hnaihah China sipai 20,000 vel dah a ni tawh a, hetiang zat vel hi  Pakistan chuan ramriah  a rawn dah ve leh ta a ni. 

Kar liam ta lam khan Pakistan sipai hruatute leh China sipai hruaitute hi an inbia nia sawi a ni a, hemi hnu hian Pakistan sipai hi Gilgit-Baltistan-ah dah a ni. Hei hian India nena an boruak pawh a tihchhiat zual phah rin a ni bawk. 

Nikum August 9-a sor­kar laipuiin J&K state nihna hlip a, Union Territory pahniha a ṭhen hnu khan Ladakh lamah Gilgit-Baltistan hmun hi dah a ni a, mahse he hmun hi Pakistan ram luah, occupied territory a ni. 

Intelligence report chuan Chinese official-ten Pakistan firfiak pawl, Al Badr mi leh sa ṭhenkhat meeting an neihpui niin an sawi. He pawl hi Kashmir-a tharum thawhna thlen fo ṭhin an ni. Chinese official-te nena an inkawmna aṭang hian he pawl intuaitharna tur hian China hian puih a tum nia rinhlelhna pawh a awm a ni.