Delhi Chief Minister-in emergency meeting ko
Haryana state-in Hathni Kund Barrage aṭangin tui cusec nuai nga zet a paihchhuah chuan vawiin hian Delhi hmun hniam lam a thlen rin a ni a, hei vang hian nimin khan Delhi Chief Minister Arvind Kejriwal-a chuan emergency meeting a ko.
Yamunna lui tui chuan hlauhawm chhinchhiahna a pel tawh a, Haryana-in tui a paihchhuah leh bawk avangin Delhi hmun hniam laia chengte chu tuilian tuar thei dinhmunah an ding a, hei vang hian lo inbuatsaih dan tur ngaihtuahin CM hian meeting hi a ko a ni. Meeting-ah hian MLA te bakah Delhi Police, Delhi Urban Shelter Improvement Board (DUSIB), urban development, Irrigation and Flood Control, Army, MCDs, PWD, Delhi Jal Board, CATS, Health, Revenue, DDMA leh stakeholder department-a official-te an tel a ni.
CM chuan department hrang hrang nena lo inbuatsaih turin a ti a, a ṭul thuta koh turin quick response team (QRT) pawh inring tura hrilh an n bawk. Agency-te chuan tuilian tuar thei dinhmuna ding mekte hi hmun him lamah sawnchhuah ṭan an nih thu CM hi an hrilh a, heng mite awmna tur hian puan in te pawh kaih a ni tih an sawi. Kejriwal-a chuan heng mite hnena ei tur leh tui thianghlim pek turte ngaihtuah tura tiin, emegency medical team pawh duty reng turin a ti bawk.
DUSIB te chu puan-in kaiha awm mekte hman tura an mobile toilet-te dah chhuak tura tih a ni a, Education department leh municipal corporation te pawh a ṭul huna harsatna tawkte awmna tura school hmunte lo buatsaih tura tih an ni bawk.
Power company hrang hrangte chu puan-in kaiha awmte hnena 24x7 electricity supply pek theihna tur ruahmanna siam turin ngen an ni a, hei bakah hian an official-te chu Flood Control Room-ah dah turin an ti bawk.
Tui a len palha harsatna tawkte chhanchhuah leh hruaichhuah hna thawk tura lo inring lawk turin sipaite pawh ngen an ni a, motorboat neitu agency hrang hrangte pawh thiarchhuah hna thawk tura lo peih fel vek tura tih an ni.
Hathikund barrage-a Yamuna lui tui level hian hlauhawm chhinchhiahna cusec 90,000 a pel tawh a, Pathianni zan dar 9 thleng khan tui hi cusec 49,2351 paihchhuah a ni tawh. Old Delhi Railway Bridge-a Yamuna level pawh hian meter 205.36 a thleng tawh a, a la san belh zel dawn niin official-te chuan an sawi. Old Rly Bridge-a Yamuna level hian meter 204.92 a thleng tawh bawk.
Yamuna lui tui san zel vang hian Northern Railway (NR) chuan Pathianni zanlai aṭang khan Old Yamuna rail bridge a khar a, hei vang hian khualzin phur rel 27 tlan tur pawh cancel a ni a, express train 14 chu kawng dangah tlantir an ni.