State 9-ah PM housing scheme hnuaia in sak hna 4% chauh la zo

Prime Minister Narendra Modi-a housing scheme, Pradhan Mantri Awas Yojana-Grameen (PMAY-G) hnuaia kumina state pakua hnena in nuai 20 chuang sakna tur sanction tawhah 4.05% chauh zawhfel a la ni tih Minister of Rural Developement chuan a tarlang.

Ministry data-a tarlan danin, Chhattisgarh, Haryana, Jharkhand, Madhya Pradesh, Maharashtra, Odisha, Rajasthan, Uttar Pradesh leh West Bengal-ah te in 20,23,884 sakna turah 82,143 chauh sak zawh a la ni. Haryana, Uttar Pradesh leh Chhattisgarh te chu hna thawk ṭha lo ber an ni a, Haryana hian in 10 sak tura a target laiin tun thlengin sak a la nei lo a, Uttar Pradesh pawhin engmah a la sa lo bawk. Chhattisgarh chuan sanction aṭang hian 0.04% ( in 146) chauh a sa bawk a ni.

State pakua zinga a thawk ṭha pahnih, Madhya Pradesh leh Odisha pawh an record a ṭha lo hle a, Madhya Pradesh hian 9.7% leh Odisha-in 9.08% a zo a ni.

Ministry official-te chuan hna thawh muan chhan hi a chhan hrang hrang a awm tih sawiin, a chhan bulpui ber chu state sorkar nena thawhdunna a ṭhat tawk loh vang niin a sawi. Ministry chuan thil awmdan hi thlir nawn lehin, chak zawka hma lak dan tur a ngaihtuah dawn tih an sawi.