IRCTC scam chungchangah Lalu leh a chhungte court-in ko

Indian Railway Catering and Tourism Corporation (IRCTC) in private company hnenah hotel pahnih siamna tura contract a pek danah thil dik tawk lo a awm nia sawi chungchangah nimin khan Delhi court chuan Rashtriya Janata Dal (RJD) hruaitu Lalu Prasad Yadav, a nupui Rabri Devi leh a fapa Tejashwi Yadav-te chu August 31 hmaa court-a inlan turin a ko.

Kumin May thla khan Central Bureau of Investigation (CBI) chuan IRCTC thil tih dan dik lo kaihhnawihah hian Patiala House Court-ah document a lo thehlut tawh a ni. Agency-in he thil thleng chungchang a chhuina document hi phek 20,000 chuang zeta chhah a ni.

CBI chuan Bihar chief minister hlui Rabri Devi bakah deputy chief minister hlui Tejashwi Yadav-te hi thu an lo zawtfiah tawh bawk.

IRCTC-in private company hnenah contract a pekna turah hian Yadav chhungkua hi inrawlhin, contract dawngtu company hnen aṭang hian lawmmanah ram zau tak an dawng nia sawi a ni. He thil dik lo tihnaah hian Lalu chhungkua bakah midang 11 pawh inhnamhnawiha puh an ni.

Kum 2006-a Union Railway Minister a nih laiin, Lalu Prasad Yadav hian IRCTC hotel pahnih enkawlna tur hi private contractor hnenah pein, an laka aṭang hian thamna, ram acre thuma zau a dawng a ni. Dik lo taka contract inpeknaa inhnamhnawiha puh zingah hian union minister hlui Prem Chand Gupta leh a nupui Sarla Gupta, hetih hun laia IRCTC managing director BK Agarwal leh director Rakesh Saxena te pawh an tel. Anni bakah hian ICRTC group general manager hlui VK Asthana leh RK Goyal te, Sujat Hotels director VijayKochhar leh Vinay Kochhar te, Chankaya Hotel neitute an tel bawk.