Vaccination Certificate-a PM Modi thlalak paih tura ngentu Kerala High Court-in Rs nuai 1 a chawi tir

Covid-19 vaccination certificate-a prime minister Narendra Modi thlalak chuantir a nih avanga petition thehlut a, PM thlalak paih tura ngentu chu Kerala High Court-in a petition a hnawlsak bakah, cheng nuai khat a chawi tir zui bawk.

Justice PV Kunhikrishnan chuan, "Tumahin Prime Minister hi Congress PM, BJP PM emaw eng political party PM emaw tiin an sawi tur a ni lo. Dan ang thlapa prime minister atan thlan tlin anih tawh chuan, kan ram pum prime minister a ni a, ram mipuite pawhin kan chhuang em em tur a ni," a ti.

Prime Minister kaihhruai sorkar policy leh an ngaihdante chu mipuite chuan an pawm vek kher lo maithei, mahse hetiang pawh hi ni mah se ram mipuite chuan vaccination certificate-a PM thlalak dah chu an zahpui tur a ni lo, tiin judge chuan a sawi bawk.

Petition thehluttu hi kar ruk chhunga Kerala State Legal Services Authority (KeLSA) hnenah cheng nuai khat pe turin hriattir a ni a, hun pek chhunga a sum chawi tur hi a pe lo a nih chuan a chawi tur hu hi a thil neih aṭangin hralhsak a ni ang, tiin court chuan a hrilh.

High Court-a petition thehluttu hi Right to Information (RTI) activist Peter Myaliparampil a ni a, private hospital-a Covid-19 vaccine la turten sum an chawi a ngaih laia vaccination certificate-a PM Modi thlalak chuan tir chu fundamental rights palzutna a ni, a ti. Certificate chu 'private space' a ni a, a neitu nihna kimchang dah a ni laia PM Modi thlalak lo dah tel chu an mimal thila inrawlhna, thil tihawm lo tak a ni tiin a sawi.