India-ah Omicron variant kai hmuh belh zel

India ramah Thawhlehni khan Covid-19 kai 6,317 hmuh chhuah thar an ni a, tunlaia khawvel huapa Covid hri darh thar leh mek, Omicron variant kai pawh nimin thleng khan India-ah 213 hmuh chhuah an awm tawh.

Thawhlehni khan Covid-19 vangin mi 318 an thih belh leh a, India ramah hripui vanga thi hi mi 4,78,325 an awm tawh a ni.

Hri kai mek, active case hi 78,190-ah a tla thla tawh a, ni 575 hnua a hniam ber ṭum a ni. Nitin hri kai thar hi ni 55 chhung chu 15,000 hnuai lam niin postitve rate 0.51% a ni a, ni 79 chhung 2% hnuai lamah a awm tawh. Kar khata hri kai thar pawh 0.58% a ni mek a, ni 38 chhung 1% hnuai lamah a awm tawh bawk.

Active case hi hri kai hmuh chhuah tawh aṭangin 0.22% an ni a, hri kai enkawl dam tawh hi 98,40% niin nikum March thla hnu lama a san ber lai a ni bawk. Hetih lai hian hri kai zinga1.38% in Covid-19 hi an thihpui a ni.

Ministry of Health and Family Welfare-in nimin zinga data a tihchhuahah, India ramah Omicron variant kai hmuh chhuah 213 an awm tawh a, an zinga 57 chu Delhi-a mi niin, Maharashtra-ah 54 an awm. Karnataka-ah 19, Rajasthan-ah 18, Kerala-ah 15 leh Gujarat-ah 14 hmuh a ni tawh bawk a ni. Omicron kai zinga 90 chu enkawl dam an ni tawh thung.

India ramah Omicron kai hmuh chhuah belh zel a nih avangin sorkar laipui chuan state leh union territory-te chu hri dona kawnga ṭan la thar tur leh, war room (emergency operation centre)-te pawh kalpui leh turin a ti. District leh local level-ah hri darh dante ngun taka thlithlai reng tur leh, hri darh zel tur venna atana kaihhruaina siamte pawh khauh taka kengkawh turin a ti.

Union health secretary Rajesh Bhushan chuan state leh union territory-te hnena lehkha a thawnah, Omicron variant chu Delta variant aia a let thuma inkaidarh a awlsam thu hrilhin, hri darh tur venna atan a ṭul anga zan lam curfew, punkhawm khapna, inneih inkhawm leh mitthi vuina hmuna kalthei zat bithliah siamte chu kalpui turin a chah.

Vawiinah PM hoin review meeting nei dawn
India ramah Omicron variant kai an pun chhoh zel avangin prime minister Narendra Modi hoin vawiin hian ram chhung dinhmunte thlirin review meeting an nei dawn.

PM Modi hian a hma pawhin hri leng dinhmun thlirin review meeting hi a lo ko ṭhin tawh a, meeting a koh hnuhnun ber chu November thla tawp lamah khan a ni.

Union health minister Mansukh Mandaviya chuan Omicron darh zel tur venna kawngah sorkar laipui chuan hma a la ṭha tawk hle tih a sawi a, expert team nen he variant chungchang pawh hi an zirchian thu a sawi.