Myanmar tan Covid vaccine leh buhfai pe

India chuan Myanmar ram puihna turin India siam Covid-19 vaccine dose maktaduai khat a pe a, buhfai leh wheat ton 10,000 a thawn dawn tih a puang bawk.

Myanmar ram tlawh zing, foreign secretary Harsh Vardhan Shringla chuan Nilaini khan vaccine hi Myanmar Red Cross Society hnenah a hlan a, buhfai leh wheat pawh thawn luh a ni thuai dawn tih a sawi.

Kumin February 1-a Myanmar civil sorkar paihthlak a nih hnuah Shringla hi India high-level official zingah Myanmar tlawh hmasa ber a ni. Nilaini leh Ningani kha chamin, a cham chhung hian State Administrative Council chairman general Min Aung Hlaing bakah civil society member leh political party aiawhte a hmu bawk a, an zingah hian Aung San Suu Kyi party, NLD party aiawhte pawh an tel.

Foreign secretary chuan Myanmar mipuite puihna turin Rakhine State Development Programme leh Border Area Development Programme chu kalpui chhunzawm zel an tum thu a sawi bawk.