Ni khata Omicron kai hmuh chhuah tam ber ni thleng

India ramah Ningani khan Omicron variant kai hmuh chhuah thar mi 122 an awm a, ni khatah Omicron kai hmuh tam ber ni a ni. Heng mite nen hian India rama Omicron variant kai hmuh chhuah tawh hi mi 358 an awm tawh a, an zinga 114 chu enkawl dam an ni tawh thung.

Variant thar kai hmuh chhuah tawh zinga mi 88 chu Maharashtra state-a mi an ni a, Delh-ah 67, Telangana-ah 38 leh Tamil Nadu-ah 34 an awm tawh.

India rama Omicron kai hmuh zinga 91% hi vaccine dose kima la tawh an ni a, 27% chu ram pawn lama zin chhuahna nei lo an ni bawk. Hei vang hian expert-te chuan India-a vaccine hman mekte hian Omicron lakah hna a thawh loh hlauhthawnna an nei a, hei bakah hian tualchhungah he hri hi a darh chhoh hlauhna pawh a lian hle.

Omicron variant a darh chhoh zel avangin vaccine dose kima la tawh, mi 3,000-ah booster enchhin tum a ni. Europe ram eng emaw zat leh ram dang ṭhenkhat chuan booster hi an lo pe chhuak tawh a, India ramah chuan scientific expert-ten pe chhuak ve turin ngen mah se sorkar lamin thutlukna a la siam lo. Kar liam ta khan sorkar chuan Delh High Court hnenah hemi chungchang hi an la zirchiang mek tih a hrilh.

Ram hrang hrang 108-ah Omicron variant hi hmuh a ni tawh a, he variant kai hmuh chhuah hi nuai 1.5 chuang an awm tawh a, an zinga 26 in an thihpui tawh a ni. Omicron kai tamna ber UK-ah chuan mi 90,000 chuangin an kai a, Denmark-ah mi 30,000 vel an awm tawh bawk. Omicron hi inkaidarh awlsam tak a ni a, WHO chuan he hri kai hi ni 1.5-ni thum chhungin a letin an pung hman zel niin a sawi.