Foreign Secretary-in Suu Kyi hmuh a dilna hnawlsak

Myanmar ram tlawha zin, foreign secretary Harsh Shringla'n Myanmar civil hruaitu, pawn chhuak thei loa hren mek Aung San Suu Kyi hmuh a dilna chu Myanmar sipai sorkar chuan a hnawlsak.

Harsh Shringla hian Suu Kyi hmu thei lo mah se, a party National League for Democracy (NLD) hotu dangte erawh a hmu thei a ni. Anni bakah hian civil society hruaitute a hmu bawk.

Shringla hian Myanmar sipai hotute chu India leh Myanmar ramriah boruak ṭha leh muanawm siam a ṭul thute a sawipui a, ramri kaltlanga pawikhawihna thleng ṭhin tihtawp a ṭul thute pawh a sawi bawk. Ram pahnih aiawhte chuan an ram chin chu ram dang beihna atan hman a nih lohna tura theihtawp chhuah an intiam dun.

Myanmar rama a rang thei anga mipui rorelna din chu India-in a duh tak zet tih Shringla chuan sawiin, sipai sorkar duh lohna lantirtu zinga man leh jail tantir mekte chu chhuah turin a ngen bawk a ni.