Omicron laka invenna atan vaccine lak ringawt a tawk lo : Sorkar laipui

Covid-19 hri thar, inkardarh awlsam tak Omicron variant chu India ramah a darh chho mek.

India rama Omicron variant kai hmuh chhuah tawh zinga 10-a pakua chu vaccine dose kim la tawh a ni. Hei vang hian he hri darh zel tur venna atan vaccine lak ringawt chu a tawk lo a, fimkhur taka awm chhunzawm zel a, facemask te hman ṭhat lehzual a ngai tih sorkar laipui chuan a sawi.

Union health secretary Rajesh Bhushan chuan Omicron kaite zirchianna neihah, an zinga 27% chu ram pawn lama zin chhuahna nei lo an ni tih sawiin, hei hian he hri hi ram pawn lama rawn lutteah lo pawh, India ram chhungah pawh a awm tawh ngei a ni tih a tichiang a ni.

Omicron kai hmuh chhuah tawh zinga 91% chu vaccine dose kima la tawh niin, an zinga pathum chuan booster dose pawh an la tawh bawk. Covid-19 task force hotu, Dr VK Paul chuan Omicron hi Delta aiin chhungkuaah inkaidarh theihna a sang zawk tih a sawi a, hei vang hian mipuite chu fimkhur zual tur leh, face mask, kut sil leh punkhawmnaa tel lohte chu ngaih pawimawh thar leh turin a ngen. Ṭul tawp a nih loh chuan zin chhuak lo tur tein a ngen bawk.

Dr Paul chuan hri kai an pun chhoh leh a rinawm avangin private sector hospital-te pawh lo inbuatsaih lawk turin a chah bawk a ni.