Jan 3 aṭangin kum 15-18 inkarte Covid vaccine pe dawn ; Healthcare worker-te booster pek an ni dawn

Prime minister Narendra Modi chuan Krismas nia ram mipuite hnena thuchah a sawiah, nakkum January 3 aṭangin ram chhung kum 15-18 inkarte tan Covid-19 vaccine pek chhuah ṭan a ni dawn tih a sawi.

January 10 aṭangin healhtcare healtcare worker leh kum 60 chin, natna benvawn neite tan booster dose pek tum a ni bawk tih PM chuan a sawi bawk. Mahse booster dose tia sawi loin, fimkhur thila invenna, precaution dose tiin a sawi thung.

PM Modi chuan, "Coronavirus hi a lo bo lo a, tunah chuan khawvelin Omicron a buaipui leh mek a ni. Vawiin Krismas ni leh prime minister hlui, Atal Bihari Vajpayee pianchan pualin sorkar chuan a thutlukna siam hi a puang duh a ni," a ti. Naupangte hnena vaccine pek chuan hri leng dona kawngah nasa takina pui thei dawn a, school-a zirtirna kalpuina pawh dan pangngaia kalpui a nih theihna turin a pui dawn a ni, a ti.

Khawvela Covid DNA vaccine hmasa ber tur, nasal vaccine pawh India ramah siam a ni thuai dawn tih Modi chuan a sawi bawk.

Prime Minister-in a tarlan danin, India rama puitling 61% in Covid vaccine dose hnihin an la tawh a, 90% in dose khatna an la tawh bawk.

Bharat Biotech-in Covid vaccine a siam, Covaxin chu naupang kum 12 chunglam chin hman atan pawmsak a ni tawh bawk. Hemi hma hian naupangte hman turin Zydus Cadila siam, ZycoV-D chu pawm a lo ni tawh bawk a ni.

India rama Omicron variant darh mek karah mipuite chu chiai lo turin PM Modi chuan a chah a, "Mi tam tak Omicron kai hmuh chhuah ni tawh mah se chiai mai lo a, fimkhur leh inring renga awm turin ka chah duh cheu a ni. Kut silfai uar a, mask vuah pawimawhzia hre reng ang u," tiin a sawi.