Right Wing Group-in Krismas lawmna tibuai

Karnataka-a Mandya district-a school pakhata Krismas lawmna hun hmangte chu Hindutva organisation member-te chuan luhchilhin an tibuai a, zirtirtute hnenah an thil lawm chu titawp turin an hrilh.

Right wing group member-te hian Nirmala English High School and College-a Krismas lawmte chu tibuaiin, school thuneitute chu an zirlaite Kristian sakhuaa inlehluih tirah puhin, an school-ah hian Hindu leh Muslim pathiante lemte tar turin an ti a ni.

Karanataka Kristian zirna inte hi righ wing group hian a tibuai fo nia sawi a ni. Karnataka Assembly hian tun hnaia sakhaw inleh khapna, anti-coversion bill a pass a, he bill pass a nih hnuah Kristiante biak-in leh ṭawngṭaina hmunte beih a nih thu report eng emaw zat a awm tawh a ni.

Nirmala English High School and College principal, Kanika Francis May chuan kumtinin zirlaite an ngen angin an school-ah Krismas lawmna hi an buatsaih ṭhin a, kuminah pawh zirlaite hian anmahni thuin a lawmna buatsaihna tur hian Rs 50 ṭheuh ah thawhkhawm tih a sawi. An school zirlaite hi sakhaw hrang hrang zuitute an ni a, Krismas chauh ni loin Deepavali leh Ramzan-te pawh an lawm ṭhin tih a sawi.

He thil thleng chungchangah hian police-te chuan thubuai thehluh a la awm lo tih an sawi a, mahse Hindutva group-te chu midangte tibuai lo tura hrilh an ni an sawi a ni.