ECI-in health minsitry official-te meeting neihpui

India ramah Covid-19 hri thar, Omicron variant a darh chhoh mek avangin nakkuma state panga-a assembly inthlan neih tur chungchang sawipuiin, nimin khan Election Commission of India (ECI) chuan union health ministry senior official-te meeting a neihpui.

Nakkum kumtir lam hi state panga - Uttar Pradesh, Manipur, Uttarakhand, Goa leh Punjab-ten assembly inthlan an neih kum tur a ni a, mahse hri a darh thar leh avangin ruahmanna hi eng angin nge kalpui a ni dawn a chiang thei ta lo a ni.

Allahabad High Court chuan ECI hnenah hian UP inthlan neihtur hi thla hnih vela sawn hla turin a lo ngen tawh bawk.

Expert hrang hrangte chuan India ramah Covid-19 hripui len thawh thumna chu January-February hian a vanglai a thleng chho leh dawn niin an sawi. India ramah Omicron kai hi 500 chuang hmuh chhuah an ni tawh a, ni khata hri kai hmuh chhuah thar pawh an pun chhoh leh avangin state tam tak chuan hri darh zel tur venna atan khuahkhirhnate siamin, zan lam curfew pawh an puang leh ṭan tawh a ni.

India ram khawpui, Delhi-ah pawh nimin aṭang khan zan lam curfew puan a ni a, zan dar 11 aṭanga a tuk zing dar 5 thleng curfew an kalpui leh dawn a ni. Khawpui chhunga hri kai thar hi Pathianni khan 16% in an pung chho leh tawh a, positivity level pawh 0.5% ah a kai leh tawh bawk.