Mother Teresa Charity-in foreign fund a dawn khapsak

Sorkar laipui chuan Mother Teresa Charity-in ram dang aṭanga ṭanpuina leh chhawmdawlna a dawn ṭhin chu dawn chhunzawm thei lo turin a dansak.

Mother Teresa Charity-in Foreign Contribution Regulation Act hnuaia foreign fund dawn phalsakna tur, a licence tihnun chhunzawm tura dilna a thehluh chu Krismas ni, December 25 khan hnawlsak a nih tih ministry chuan a sawi a ni. Ministry chuan he charity hian licence renew-na tura dan zawm ngaite a zawm famkim lo niin a sawi a, mahse eng dan nge an zawm theih loh tih erawh a sawilang lo.

Kristian charity hian FCRA application an thehluh chu pawmsak an ni lo tih pawh sawi chiang nghalin, ram chhunga an centre ho pawh hemi chungchang hi chinfel a nih hma chuan ram dang aṭanga ṭanpuina sum an dawnna ṭhin account-te pawh khawih che rih lo turin an hrilh nghal a ni.

Kum 2014-a prime minister Narendra Modi kaihhruai BJP sorkar a din hnuah ram chhunga charity leh rights group eng emaw zatin ram dang aṭanga chhawmdawlna an dawn phalsakna hi tihtawp sak an lo ni tawh a ni. Nikum khan Amnesty International chuan sorkar lam aṭanga vaukhanna an tawh fo avangin India rama an hnathawhna hmunte pawh an lo khar tawh bawk.

Mother Teresa Charity in hmunpui an neihna, West Bengal state chief minister Mamata Banerjee chuan sorkar laipuiin Kristian charity bank account hman theih loha Krismas ni taka a hrek sak chu mak a tiin a ṭhawng hle tih a sawi. He charity hnuaia thawktu leh an enkawl, mi 22,000 vel zet chu ei tur leh damdawi nei loin an awm phah dawn a ni, a ti.

Kum 1997-a boral, Roman Catholic nun, Mother Teresa khan Missionaries of Charity hi kum 1950 khan a din a, West Bengal-ah hmunpui neiin he charity hnuaiah hian India ram bakah khawvel ram hrang hrangah nun 3,000 chuangin mi rethei leh chanhai zawkte ṭanpui hna thawkin, ei turte an pe a, damlote an enkawl ṭhin a ni.

India rama Modi kaihhruai BJP sorkar a din hnuah, right-wing Hindu group-te chu state hrang hrangah an inluling hle a, sakhaw inleh khap chhuanlama hmangin sakhaw tlem zawkte an bei fo a ni. Kuminah pawh hmun eng emaw zatah right wing group-te hian Krismas lawmna hmunah te kalchilhin an tibuai a ni.