January 31 thleng khuahkhirhna dan pawtsei

Sorkar laipui chuan Covid-19 hri leng vanga khuahkhirhna dan hman chu nakkum January 31 thleng hman turin a pawtsei.

Ram chhungah Covid-19 hri kai mek, active case-in tlakhniam lam pan zel mah se, Covid hri thar, Omicron variant kai hmuh chhuah an pun chhoh zel avangin hri hi a darh leh venna turin khuahkhirhna siamte chu hman chhunzawm turin a ti. Omicron variant kai hi state 19-ah hmuhchhuah an awm tawh.

Union home secretary Ajay Bhalla-a'n thuchhuah a siam tharah, state leh union territory-te chu hri laka invenna tura pawimawh - testing, tracking, treating, vaccinating leh Covid kaihhruaina dan zawmte chu ngai pawimawh thar leh turin a ti a ni. State leh UT-te chu a ṭul da azirin tualchhungah khuahkhirhna khauh zawk pawh kalpui turin a ti bawk.

Kum 15-18 inkar tan Jan 1 aṭangin in register theih

Sorkarin kum 15-18 inkarte tan January 3 aṭangin Covid-19 vaccine pekchhuah ṭan a ni dawn tih a puan hnuah, vaccine la duhte tan hian January 1 aṭangin CoWIN app-ah in register ṭan theih a nih thu a sawi.

Kum 15-18 inkarte tan hian CoWIN-a registration tihna turah student ID card hman theihna tur dah belh a nih thu National Health Authority chief executive officer RS Sharma chuan a sawi a ni. Aadhaar leh identity card dang nei lote tan pawh student ID hi pawmsak an ni ang.