Chidambaram-a'n Krismas lawmna tibuaitute hremna pe turin PM phut

Congress senior leader, P Chidambaram chuan Haryana leh Assam state-a Kristian-te hun pawimawh, Krismas lawmna tihbuai a ni chu a dem thu sawiin, prime minister Narendra Modi chuan heng state pahniha BJP sorkarte chu pawikhawihtute chu man chhuak a, court-ah hruai ngei turin a hrilh tur a ni, a ti.

Union home minister hlui, Chidambaram chuan Haryana-a Krismas lawmna tibuaitute hian 'Jai Shir Ram' leh 'Bharat Mata Ki Jai' tihte an aukhum tih report ṭhenkhatin an tarlang tih sawiin, man chhuah an ni ngei tur a ni, a ti.

PM-in ram mipuite hnenah Isua Krista zirtirnate hrechhuak thar leh tura a fuih ni ah, misualten Krismas lawmna hun hmante an lo tibuai thung a ni, tiin Chidambaram chuan a sawi. PM chuan Hindutva pawlte chu Isua zirtirnate hi chhiar ve turin a fuih a ngai a ni, tiin a sawi.

Congress party chuan BJP sorkarna state-a Kristiante hun pawimawh hmanna leh biak-inte beih a nih chu an dem thu sawiin, heng thil thleng chungchanga PM Modi a ngawih reng chhan an zawt let bawk.