Booster dose atana Covid vaccine hman tur ngaihtuah

Sorkar laipui chuan nakkum Covid vaccine booster dose pek turah eng vaccine ber nge pek tur tih chungchang chu a ngaihtuah mek a, thutlukna a siam thuai dawn tih a sawi.

Booster dose, sorkarin precautionary dose tia a sawi hi January 10 aṭangin healthcare leh frontline worker-te bakah, kum 60 chunglam natna benvawn neite hnenah pek chhuah ṭan tum a ni.

Indian Council of Medical Research (ICMR) Director General Dr Balram Bhargava chuan precautionary dose atana vaccine hman tur chungchangah inhnialna pawh a tam tih sawiin, NTAGI (National Technical Advisory Group on Immunisation) nen pawh meeting eng emaw zat an nei tih a sawi. Data hrang hrangte an zirchiang a, vaccine dose thumna an pek turte hi an vaccine lo lak ang tawh nge, a chi dang pe tur tih chungchang ngaihtuahin, January 10 hmain thutlukna an siam dawn tih a sawi.

Booster dose hi vaccine dose hnihna lak aṭang ahla kua tling tawhte hnenah pek phawt tura tih a ni.

India ramah Omicron a darh mek karah chhung hmun hrang hrangah Covid-19 vaccine pek chhuah hna pawh ngawrh taka kalpui chhunzawm zel a ni. Puitling zinga 90% chuan dose khatna an la tawh niin union health ministry chuan a sawi. Nakkum January 3 aṭangin kum 15-18 inkarte pawh vaccine hi pekchhuah ṭan an ni tawh dawn bawk.