PM Modi-a'n loneitu mtd 100 tan Rs vbc 20,000 pe chhuak

Prime minister Narendra Modi chuan nimin khan Pradhan Mantri Kisan Samman Nidhi (PM-KISAN) scheme hnuaiah loneitu maktaduai 100 chuangte chhawmdawlna turin cheng vaibelchhe 20,900 a pe chhuak.

PM-KISAN scheme hnuaia loneitute hi sum lama chhawmdawlna, kum khatah Rs 6,000 pek ṭhin a ni. Ṭanpuina sum hi Rs 2,000 zelin ṭum thuma pek niin, a dawngtu tur bank account-ah thunsak an ni ṭhin.

Video conference kaltlangin PM Modi hian chhamdawlna tur sum hi a pe chhuak a, hei bakah loneitu nuai 1.24 vel telna, Farmer Producer Organisations (FPO)351 tan equity grant Rs vbc 14 a pe chhuak nghal bawk a ni. Virtual event hi chief minister pakua, state hrang hranga minister eng emaw zat leh agricultural institution aiawhte ten an hmanpui a ni.

Union agriculture minister Narendra Singh Tomar chuan nimina PM-in Rs vbc 20,900 a pek chhuah hi he scheme hnuaia sum pek chhuah a thawh 10-na a ni tih a sawi. August, 2021 khan a thawh kuana chu pek chhuah a ni a, nimina pek chhuah nen PM-KISAN scheme hnuaia loneitute tana sum pek chhuah hi cheng vaibelchhe nuai 1.8 a tling tawh a ni.

PM-KISAN scheme hi kum 2019 budget-ah khan puan a ni a, first instalment chu kum 2018, Decembre leh kum 2019, March thla inkar atan pek a ni.