Hri kai an pun chhoh leh avangin State-te makeshift hospital siam turin hrilh

Sorkar laipui chuan India rama Omicron variant darh chhoh mek leh, hri kai an pun leh ṭan avangin state leh union territory-te chu an healthcare infrastructure dinhmunte ennawn a, inbuatsaih turin a chah.

India ramah Omicron kai hi nimin zing lam thleng khan mi 1,400 an chuang tawh a, state pangaah mi 100 aia tam ṭheuh an awm tawh bawk. Nimin, kumthar ni khan Covid-19 hri kai hi 33,775 awm thar lehin, thipui 406 an awm bawk.

Health secretary Rajesh Bhushan chuan nimin khan state/UT te chu inralring tura chahin, hospital khum dah belh te, health care facility thuam chak leh oxygen an neih zatte enfiah turin a ti. Hri kai an pun chak leh avangin health infrastructure lam indaihna pawh a thleng chho leh mai dawn a, hei vang hia state/UT-te pawh makeshift hospital-te lo siam turin a chah nghal a ni. Hei bakah a hmaa state ṭhenkhatten an lo tih tawh ang khan, hri kai symptom nei lo leh la na deuhte awmna turin hotel-te pawh hman theih a ni, a ti.

Hri kai in lama in enkawl, home isolation-a awmte vil turin state sorkar-te chuan special team, call centre leh control room-te an din tur a ni tiin, rural area leh naupang zinga hri kai awmte pawh ngaihven ṭha turin a ti bawk.

Sorkar laipui hian state tinte chu khawsik leh taksa na neite chu Covid test neihsak vek tur leh, test result hriat chian hma chuan Covid hri kai anga enkawl zel turin a lo ti bawk a ni.