West Bengal-ah vawiin aṭangin school khar dawn

West Bengal sorkar chuan hri kai an pun leh avangin nimin aṭang khan khuahkhirhnate a siam thar leh a, vawiin atangin school leh college te khar an ni leh dawn. Private leh sorkar office-ah pawh thawktu 50% chin kal phalsak a ni.

School, college leh university-te bakah, swimming pool, gym, spa, beauty salon leh wellness centre-te pawh khar an ni bawk ang.

Chief secretary HK Dwivedi chuan office-ah thawktu 50% chin zela kal tura tih an nih bakah, administrative meeting pawh virtual-a nei zel tura tih an nih thu a sawi. Mipuite chu a theih anga tam in lam aṭanga hna thawk tura ngen an ni.

Bengal-ah hian hri kai an pun chhoh leh avangin hri kai enkawl mek, active case pawh 13,300 an awm leh tawh a, Maharashtra leh Kerala dawta tam ber an ni. Omicron variant kai pawh 20 hmuh an ni tawh bawk.