Sorkarin licence a renew duh loh avangin chhawmdawl hna a bahhlah phah dawn : Oxfam

Sorkar laipuiin ram chhunga NGO 12,000 chuangte foreign funding licence a tihnun thar duh loh zinga mi, Oxfam chuan sorkar thiltih Covid-19 hri leng kara India ram state 16-a chhamdawl hna an thawh chu a bahlah phah ngei dawn tih a sawi.

Oxfam hian state 16-ah Covid hri kaite chhawmdawl hna a thawh bakah, oxygen plant-te pawh a siam a ni. Hri leng vanga harsatna tawkte ei turte pawh a sem bawk ṭhin. Mahse union home ministry-in Oxfam India Foreign Contribution Regulation Act (FCRA) registration a tihnun thar duh loh avangin an sum hmuhnate a tawp dawn a, chhawmdawl hna pawh a hma angin an kalpui thei dawn ta lo a ni.

December 31,2021 zanlai khan Oxfam India leh NGO dang 5,932-te license chu a tawp a, an zinga a tam zawk hian an licence renew an dil lo a, mahse renew diltute pawh union home ministry chuan 'thil fel tawk lo awm' tia chhuanlamin a hnawlsak. Licence renew diltu an hnawlsak zingah hian Oxfam India leh Indian Medical Assocation (IMA) pawh an tel.

Oxfam chuan Mission Sajeevamni initiative hnuaia, state 16-ah chhawmdawl hna an thawhnaah oxygen generating plant paruk an siam tawh a, lifesaving medical equiptment 13,388 chuan an pe chhuak tawh tih an sawi. Hmanrua an pekchhuah zingah hian oxygen cylinder, BiPAP machine, concentrator leh ventilator, PPE kit, diagnostice equipment-te an tel.