Hri leng thawh hnihna aiin hri kai pung chak zawk

India ramah Covid-19 hri a leng thar leh mek a, data-a a landanin nikum April-May thlaa hri leng thawh hnihna thlen lai aiin hri kai an pung chak zawk.

Pathiannia hri kai thar 33,647 awm chu nikum September 17 hnua ni khata hri kai an tam ber ṭum a ni leh. Kar liam ta chhung khan chawhrualin nitin hri kai thar hi 18,290 awm ang an ni bawk a, nikum October 12 hnua kar khata hri kai an tam ber ṭum a thleng leh a ni.

State tinte hma la chak turin hrilh
Covid hri kai an pun chhoh zel leh, Omicron variant kai hmuh belh an nih zel avangin union health minister Mansuk Mandaviya chuan Pathianni khan state tinte chu medical infrastructure thuam chak tura hma la chak turin a hrilh.

State health minsiter leh state health department-a senior official-te nena review meeting an neihah, union minister Mandaviya chuan khawvel ram dangte ang bawkin India ramah hri kai an pung chak chho leh hle tih sawiin, medical system lawm an indaih loh leh mai theih thu a sawi. Hei vang hian state tinte chuan infrastructure thuam chaka an theih dan ang ang hma an lak a ngai a ni, a ti.