Shiv Sena-ten Maratha, Dhangar, Koli-te quota pek phut

Shiv Sena chuan Maharashtra sorkar chu Maratha, Dhangar leh Koli hnamte tana quota siamsak turin a phut.

Maratha hnam hian state sorkar hnuaia hna lakna leh zirna ina an hnam puala quota pek phutin hun eng emaw chen nawrh an lo huaihawt tawh a ni. Chief Minister Devendra Fadnavis chuan Maratha te thil phut ngaihtuah hian high-level meeting pawh alo ko tawh a ni. Maratha te nawrh huaihawtnaa buaina chhuakah mi panga in nunna an chan tawh a, hmun tam takah tharum thawhna pawh a thleng a ni.

Shiv Sena chuan an party chanchinbu, 'Saamana'-ah Maratha hnam hi reservation pek an nih chuan hnam dangte pawhin quota pek phut hian nawrh an huaihawt ve leh ang a, harsatna a thleng chho zel dawn niin a sawi. Hei vang hian state sorkar hnenah chuan hnam bil hrang hrangte thil phutte chu ngaihtuah sak turin an phut thu an sawi a, BJP chuan inthlan hma khan Dhangar hnam hnenah reservation pek a lo tiam tawh bawk niin a tarlang.

State sorkar chuan Maratha, Dhangar leh Koli te tana reservation siamsakna tur resolution hi pass in, sorkar laipui pawmpuina la turin a thawn thuai a ngai a ni tiin, Shiv Sena chuan hei hi tih a nih loh chuan an state in an tuar dawn niin a sawi.