Marriage bill : Panel-ah hmeichhe tam zawk dah turin Shiv Sena MP-in ngen

Rajya Sabha-a Shiv Sena MP, Priyanka Chaturvedi chuan hmeichhiate pasal neih theih kum, kum 18 aṭanga 21-a tihsanna tur bill ngaihtuahtu tur parliamentary panel-ah chuan hmeichhe member dah belh turin a ngen.

Rajya Sabha chairman M Venkaiah Naidu hnena lehkha a thawnah, Chaturvedi chuan member 31 awmna, Parliamentary Standing Committee on Education, Women, Children, Youth and Sports-ah chuan hmeichhe member pakhat chauh, TMC MP Sushmita Dev a awm tih a sawi.

Chaturvedi chuan hmeichhiate kaihhnawih bik thil, Indian society tana thil pawimawh tak ngaihtuahtu tur committee-a hmeichhe aiawh pakhat chauh a awm chu a beidawnthlak hle tih a sawi. He bill chungchangah hian mi hrang hrang, a bik takin hmeichhiate ngaihdan chu committee chuan a ngaihthlak a, a hriathiampui a ngai takzet a ni, a ti.

Hmeichhiate pasal neih theih kum tihsan tumna, Prohibition of Child Marriage (Amendment) Bill hi nikum Parliament Winter Session-ah khan Lok Sabha-ah pharh a ni a, Parliamentary Standing Committee on Education, Women, Children, Youth and Sports-in a lo ngaihtuah tura tih a ni.

Parliementary panel-a hmeichhe member awmchhun, MP Sushmita Dev pawhin hmeichhiate nghawng tur bill ngaihtuahtu tura amah chauh hmeichhia a awm chu mak a tih thu a sawi ve bawk a, Rajya Sabha chairman hnenah he bill chungchanga an ngaihdan leh rawtnate chu committee chairman hnenah an thlen vek phalsak tura a dil tur thu a sawi.